الشعر

أنا مش ضد التقدم

قفلوا المصنع ياخال  وبقيت انا عاطل و عالة

ومش لاقي شغل تاني  وحالتي بقت حالة

وبكره وبعدو  ياخال هناكل م. الزبالة

يا ابني بص وشوف المدن الجديدة والكباري

البلد بقت حاجة تانية وأنت اللي مش داري

أنا مش ضد التقدم ولا التطوير ولا البناء

بس لازم نفكر بهدوء ونرتب  الأشياء

ياخال أنا ساكن إيجار جديد كل يوم في مكان

إيه فايدة كل ده وانا طول العمر فقير غلبان

لا هسكن في المدن الجديدة ولا بطلع ياخال على الكباري

أنا عايز بس لقمة تسد جوعي وحبة شاي ساعة العصاري

إيجار الشقة نار وزادت الأسعار، حياتي بقت كلها فواتير

فاتورة الكهرباء والمياه والغاز ومبالغ تخلي العقل يطير

وأنا بيتي فيه سرير ودولاب وبناكل على الحصير

لازم نبني البلد من جديد، والأجيال الجاية تستفيد

وعلشان اللي جاي لازم  الجيل ده كله ياخال يموت

مطلوب مننا نتألم ونبكي وأحنا كاتمين جوانا الصوت

يا ابني هو أنت ليه ضد التقدم والتطور والبناء ….

ياخال العيال في المدارس على الأرض قاعدين

والمناهج صعبة جدا والعيال كلهم متعقدين

و الغلابة فى المستشفى الحكومي متبهدلين

ياخال التقدم يبقى فى كل حاجة ولجميع الناس

والمسؤولين لازم يعرفوا إنهم خدامين للناس

مش يبقى مسئول عننا وعايز رجليه تتباس

بقلم /منى بدوي يعقوب

مقالات ذات صلة

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock